Një rrjet ndërkombëtar i trafikut të drogës, me lidhje shqiptaro-bullgare, është shkatërruar nga autoritetet gjermane pas dekriptimit të komunikimeve të koduara në aplikacionin Sky ECC, një platformë e përdorur gjerësisht nga grupet kriminale në Evropë.
Sipas mediave gjermane, hetimet zbuluan një organizatë të sofistikuar kontrabande që operonte në disa shtete të BE-së, duke përdorur automjete të modifikuara në mënyrë profesionale me ndarje të fshehura për transportimin e sasive të mëdha të drogës.
Zyrtarët thanë se nëntë anëtarë të grupit kriminal, me shtetësi shqiptare dhe bullgare, janë dënuar me burg deri në nëntë vjet, pasi u provua roli i tyre në trafikun ndërkombëtar të substancave narkotike.
Hetimet nisën në pranverën e vitit 2021, pas hakimit të sistemit të komunikimit SKY ECC, i cili përdorej për mesazhe të koduara mes grupeve kriminale. Gjatë analizës së të dhënave, hetuesit identifikuan gjashtë PIN-e përdoruesish që komunikonin rregullisht për logjistikën e transportit të drogës dhe për mënyrat e shmangies së kontrollit policor.
Në komunikimet e zbuluara përmendeshin disa apartamente të marra me qira në Zaventem, Sint-Stevens-Woluwe, Diegem dhe Meise, përmes së njëjtës kompani qiraje, të cilat shërbenin si baza operative të grupit. Një kontroll në njërën prej tyre çoi në një provë kyçe – një letër që lidhi drejtpërdrejt personat e dyshuar me aktivitetin kriminal.
Ky zbulim përshpejtoi hetimet, duke çuar në arrestimin dhe dënimin e të gjithë anëtarëve të bandës, ndërsa autoritetet gjermane vlerësuan bashkëpunimin me agjencitë ndërkombëtare të rendit që ndihmuan në deshifrimin e komunikimeve të Sky ECC.
