Dogana e Kosovës në bashkëpunim me Policinë e Kosovës ka ndërmarrë një operacion të suksesshëm kundër kontrabandës së barnave në rajonin e Gjilanit dhe Vitisë, duke sekuestruar ilaçe të dyshuara si të kontrabanduara me vlerë mbi 4 mijë euro.
Sipas njoftimit zyrtar të Doganës, operacioni u realizua nga Task Forca e përbashkët gjatë kontrollit në dy barnatore në këto qytete, ku u gjetën sasi të konsiderueshme barnash të fshehura në ambientet e brendshme të objekteve. Për produktet e zbuluara nuk kishte dokumentacion doganor, çka ka ngritur dyshimet se ato janë futur në Kosovë në mënyrë të paligjshme, duke shmangur tërësisht procedurat zyrtare të importit dhe detyrimet doganore.
“Vlera e barnave të sekuestruara sipas vlerësimit fillestar tejkalon shumën prej 4 mijë eurosh”, thuhet në njoftimin e Doganës, e cila ka nisur procedurat hetimore ndaj pronarit të njërit prej subjekteve të kontrolluara.
Autoritetet kanë njoftuar institucionet përkatëse për veprime të mëtejshme ligjore, ndërsa Task Forca ka theksuar përkushtimin e saj për të luftuar kontrabandën, për të mbrojtur tregun e ligjshëm dhe për të garantuar sigurinë e qytetarëve.
Hetimet janë në vazhdim dhe priten zhvillime të mëtejshme lidhur me përgjegjësinë penale dhe administrative të palëve të përfshira.
