Një bombardim ajror masiv rus që zgjati më shumë se 12 orë ka lënë pas të paktën katër të vrarë dhe mbi 70 të plagosur në Ukrainë, duke përfshirë një vajzë 12-vjeçare.
Presidenti ukrainas Volodymyr Zelensky i cilësoi sulmet si “të liga” dhe paralajmëroi se Ukraina do të hakmerret. Ai tha se Rusia po dëshmon se synon ta vazhdojë luftën dhe “të vrasë”, ndërsa shënjestroi kryesisht kryeqytetin Kiev, ku ranë shumica e predhave.
Sipas autoriteteve, breshëria e armëve përfshinte gati 600 dronë dhe disa dhjetëra raketa, të lëshuara në shtatë rajone të vendit. Mes objekteve të goditura ishin Instituti i Kardiologjisë në Kiev, ku humbën jetën një infermiere dhe një pacient, si dhe një furrë buke, një fabrikë gome dhe disa ndërtesa banimi.
Ministri i Brendshëm Igor Klymenko konfirmoi se të paktën 100 ndërtesa civile u dëmtuan në mbarë vendin, ndërsa qindra njerëz u strehuan në bunkere gjatë natës.
Guvernatori i Zaporizhzhias raportoi 34 të plagosur, përfshirë tre fëmijë në gjendje të rëndë, ndërsa autoritetet në Sumy njoftuan për një viktimë 59-vjeçare.
Zelensky kërkoi reagim të fortë nga SHBA-ja dhe Evropa, duke theksuar se sulmet ndodhën menjëherë pas përfundimit të Asamblesë së Përgjithshme të OKB-së, si një mesazh i qartë i Moskës. Ai përshëndeti qëndrimin e presidentit amerikan Donald Trump për sanksione më të ashpra ndaj Rusisë dhe thirrjet për reduktimin e varësisë evropiane nga gazi dhe nafta ruse.
Ndërkohë, Polonia dhe Danimarka raportuan prani të dronëve mbi hapësirën dhe bazat e tyre ushtarake, duke rritur tensionet në krahun lindor të NATO-s. Aleanca njoftoi masa shtesë sigurie në Detin Baltik, përfshirë patrullime të rritura dhe dislokimin e një fregate të mbrojtjes ajrore.
Moska mohoi përgjegjësinë për incidentet dhe përmes ministrit të saj të Jashtëm Sergei Lavrov deklaroi se “nuk synon sulme ndaj vendeve të NATO-s”, por paralajmëroi për një “përgjigje vendimtare” ndaj çdo agresioni kundër Rusisë.
