Volodymyr Zelensky po përgatitet të shpallë më 24 shkurt planin për mbajtjen e zgjedhjeve presidenciale dhe një referendumi kombëtar në Ukrainë gjatë pranverës. Lajmi është publikuar nga Financial Times, duke cituar zyrtarë ukrainas dhe evropianë të përfshirë në procesin e planifikimit.
Sipas raportimit, autoritetet në Kiev kanë nisur përgatitjet paraprake për organizimin e zgjedhjeve presidenciale, paralelisht me një referendum të mundshëm që do të lidhej me një marrëveshje paqeje me Rusinë.
Ndërkohë, Reuters raportoi javën e kaluar se, në kuadër të diskutimeve mes negociatorëve të SHBA-së dhe Ukrainës, çdo marrëveshje e arritur për paqe do t’i nënshtrohet miratimit përmes referendumit nga qytetarët ukrainas. Sipas të njëjtave burime, votimi për referendumin mund të zhvillohet njëkohësisht me zgjedhjet kombëtare.
Burimet e cituara theksojnë se një nga opsionet në shqyrtim është që zgjedhjet dhe referendumi të mbahen në muajin maj, nëse arrihet dakordësi politike dhe krijohen kushtet e nevojshme për organizimin e procesit zgjedhor.
Deri më tani, autoritetet ukrainase nuk kanë dhënë një konfirmim zyrtar për datën e mbajtjes së zgjedhjeve, por raportimet sugjerojnë se pranvera mund të jetë momenti kyç për një zhvillim të ri politik në vend.
