Presidenti i Ukrainës, Volodymyr Zelensky, gjatë takimit në Zyrën Ovale me homologun e tij amerikan, Donald Trump, ka dorëzuar një letër personale nga zonja e parë e Ukrainës, Olena Zelenska, e cila ishte drejtuar për Melania Trump.
“Gruaja ime, zonja e parë e Ukrainës, dha një letër. Nuk është për ty – por për gruan tënde”, u shpreh Zelensky, duke shkaktuar të qeshura mes të pranishmëve.
Në këtë takim, Zelensky falënderoi Trump për “përpjekjet e tij personale” për t’i dhënë fund luftës në Ukrainë, duke e konsideruar mbështetjen amerikane jetike për arritjen e paqes.
Nga ana tjetër, presidenti Trump deklaroi se është duke u bërë “përparim i konsiderueshëm” në përpjekjet për t’i dhënë fund luftës. Ai përmendi edhe takimin e fundit me presidentin e Rusisë, duke shtuar se ekziston mundësia reale që ky proces të sjellë rezultate pozitive.
“Patëm shumë diskutime dhe mendoj se po bëhet përparim i madh në shumë mënyra”, tha Trump. “Takimi me presidentin rus ishte i mirë dhe mendoj se diçka konkrete mund të dalë prej tij.”
