Presidenti i Ukrainës, Volodymyr Zelensky, ka deklaruar se është i gatshëm të takohet me presidentin rus Vladimir Putin për bisedime paqeje, duke theksuar se do të bëjë gjithçka për t’i dhënë fund luftës.
Në një intervistë për Sky News, Zelensky tha se Shtetet e Bashkuara kanë fuqinë për të ndalur konfliktin, por sipas tij, Uashingtoni duhet të rrisë presionin ndaj Moskës.
“Shtetet e Bashkuara janë edhe më të forta sesa mendojnë për veten e tyre. Ata mund të ushtrojnë presion mbi Putinin dhe ta ndalojnë këtë luftë”, u shpreh Zelensky.
Ai kërkoi nga administrata amerikane që të ashpërsojë sanksionet ndaj familjeve të udhëheqjes ruse dhe të furnizojë Ukrainën me armë më të avancuara, duke argumentuar se vetëm një presion më i madh mund ta detyrojë Rusinë të marrë seriozisht negociatat.
Zelensky shtoi se ekziston një mundësi reale për arritjen e paqes, duke theksuar se muajt e ardhshëm do të jenë vendimtarë për përfundimin e luftës, ndoshta edhe para vjeshtës dhe zgjedhjeve të rëndësishme në Shtetet e Bashkuara.
Ndërkohë, raundi i tretë i bisedimeve mes Ukrainës, Rusisë dhe SHBA-së është zhvilluar më 18 shkurt në Gjenevë, por palët mbeten ende larg një marrëveshjeje për çështjet kryesore, përfshirë territorin dhe kushtet e armëpushimit.
Rusia kërkon kontroll të plotë mbi rajonet lindore të Donetskut dhe Luhanskut në Donbas, kërkesë që Ukraina e refuzon duke e konsideruar si dorëzim të territorit sovran.
Një tjetër pikë e rëndësishme e mosmarrëveshjes është edhe statusi i centralit bërthamor të Zaporizhzhisë, më i madhi në Evropë, i cili ndodhet në vijën e frontit dhe është nën kontrollin rus që nga marsi i vitit 2022.
