Presidenti i Ukrainës, Volodymyr Zelensky, ka deklaruar se presidenti rus Vladimir Putin ka nisur tashmë Luftën e Tretë Botërore dhe se ai duhet të ndalet përmes presionit të fortë ushtarak dhe ekonomik nga komuniteti ndërkombëtar.
Në një intervistë për BBC gjatë fundjavës, Zelensky theksoi se Ukraina nuk po humb luftën dhe se vendi i tij synon ta përfundojë konfliktin me fitore.
“Unë besoj se Putini e ka nisur tashmë Luftën e Tretë Botërore. Pyetja është sa territor do të mund të pushtojë dhe si ta ndalim atë. Rusia dëshiron t’i imponojë botës një mënyrë tjetër jetese dhe të ndryshojë jetën që njerëzit kanë zgjedhur për veten e tyre”, deklaroi ai.
Presidenti ukrainas hodhi poshtë çdo ide për një armëpushim që do ta detyronte Ukrainën të tërhiqej nga territore strategjike që Rusia nuk ka arritur t’i pushtojë, pavarësisht humbjeve të mëdha në njerëz dhe pajisje ushtarake.
Sipas Zelenskyt, kërkesat e Moskës që Ukraina t’i dorëzojë rreth 20 për qind të rajonit lindor të Donetskut dhe territore shtesë në rajonet jugore të Khersonit dhe Zaporizhzhias nuk lidhen vetëm me territorin, por me të ardhmen dhe sovranitetin e Ukrainës.
Ai theksoi se vetëm përmes presionit të madh politik, ekonomik dhe ushtarak ndaj Rusisë mund të arrihet ndalimi i agresionit dhe vendosja e paqes në rajon.
