Presidenti i Ukraina, Volodymyr Zelenskyy, ka ofruar ekspertizën ushtarake të vendit të tij për të ndihmuar në zhbllokimin e Ngushticës së Hormuzit, një nga arteriet më të rëndësishme të energjisë në botë.
Zelensky theksoi se përvoja e Ukrainës në thyerjen e bllokadës ruse në Detin e Zi gjatë viteve 2023–2024 mund të shërbejë si model për situatën aktuale në Gjirin Persik, ku tensionet me Iranin kanë rrezikuar rrjedhën globale të naftës dhe gazit.
Ai bëri të qartë se Kievi nuk synon vetëm të eksportojë armë, por të ofrojë një qasje të plotë strategjike, që përfshin mbrojtje detare, përdorim të dronëve, koordinim ajror dhe sigurim të korridoreve tregtare.
Ekspertët ukrainas theksojnë se suksesi në Detin e Zi erdhi nga një kombinim i teknologjisë – veçanërisht dronëve detarë – dhe koordinimit të forcave të ndryshme ushtarake, duke krijuar një “korridor të sigurt” për anijet tregtare.
Në një kohë kur mbi 20 vende po shqyrtojnë mënyra për të rihapur këtë rrugë kyçe globale, Ukraina po pozicionohet si një aktor i ri me përvojë reale në luftën moderne detare. Mesazhi nga Kievi është i fortë: në epokën e luftës hibride, përvoja në terren vlen më shumë se çdo teori.
