Presidenti i Ukrainës, Volodymyr Zelenskyy, dhe bashkëshortja e tij, Olena Zelenska, janë bërë sërish objekt i akuzave të rreme për korrupsion dhe pasuri të paluajtshme luksoze, në një përpjekje të re për të minuar mbështetjen ndaj Ukrainës në luftën kundër agresionit rus.
Një video e publikuar në internet pretendon se Zelenskyy është pronar i një “perandorie pronash” me vlerë mbi 1.2 miliardë dollarë, të shpërndara në disa shtete europiane dhe në Emiratet e Bashkuara Arabe. Ajo thotë se një ish-hetuese e Byrosë Kombëtare Kundër Korrupsionit të Ukrainës (NABU), e identifikuar si “Olena K.”, ka dezertuar jashtë vendit duke marrë me vete dosje të supozuara që ekspozojnë korrupsion në nivelet më të larta të qeverisë ukrainase.
Megjithatë, verifikimet tregojnë se nuk ka asnjë provë që mbështet këto pretendime. Zëri në video është i gjeneruar nga inteligjenca artificiale dhe faqja që e publikoi – e quajtur The London Telegraph – është e dyshimtë, me elementë që imitojnë emra mediash të njohura britanike si The Daily Telegraph dhe London Evening Standard. Adresa e internetit mbaron me “.uk”, në vend të “.co.uk” ose “.com”, duke shtuar dyshimet për legjitimitetin e saj.
Sipas verifikuesve të fakteve, fotografia e gazetares që pretendohet se ka shkruar artikullin është vjedhur nga një autore e vërtetë, pa asnjë lidhje me faqen. Nuk ka raportime nga media të besueshme mbi ekzistencën e një ish-agjenteje të NABU-së që ka dezertuar dhe as për dosje që implikojnë presidentin ukrainas.
Zelenskyy dhe bashkëshortja e tij kanë qenë shpesh objekt i dezinformatave të ngjashme. Euronews më parë ka hedhur poshtë pretendimet se Zelenskyy bleu një vilë shumë milionëshe në Florida apo se Zelenska shpenzoi 4 milionë euro ndihma për blerjen e një makine Bugatti.
Ekspertët theksojnë se këto narrativa janë pjesë e një fushate të koordinuar dezinformimi që synon të ulë besimin e opinionit publik ndërkombëtar tek udhëheqja ukrainase dhe të dobësojë mbështetjen për Kievin, ndërsa Rusia vazhdon agresionin e saj ushtarak.
