Aleanca Kosova e Re (AKR) do të garojë në zgjedhjet e jashtëzakonshme të 28 dhjetorit si pjesë e listës së Lidhjes Demokratike të Kosovës. Vendimi është konfirmuar nga kryetari aktual i AKR-së, Vesel Makolli, i cili tha se marrëveshja është arritur pas një takimi me kreun e LDK-së, Lumir Abdixhiku.
“Po është e vërtetë, unë sot pasdite kisha takim me z. Abdixhiku, ku u morëm vesh të jemi pjesë e listës së tyre. Vendimin e kemi marrë pas përsiatjeve të situatës aktuale politike dhe pas sugjerimeve të presidentit tonë z. Behgjet Pacolli,” deklaroi Makolli për KlanKosova.
Ai bëri të ditur se marrëveshja pritet të nënshkruhet në mënyrë ceremoniale të martën e ardhshme, ndërsa deri atëherë do të finalizohen të gjitha detajet teknike mes dy subjekteve.
LDK e hapur për bashkëpunime të tjera
Lidhja Demokratike e Kosovës ka sinjalizuar hapje të plotë për koalicione zgjedhore. Në një konferencë për media të mërkurën, deputeti Armend Zemaj konfirmoi se LDK-ja është në bisedime edhe me Nismën Socialdemokrate.
Ky bashkim me AKR-në konsiderohet lëvizja më e madhe e deritanishme në konsolidimin e bllokut opozitar përpara zgjedhjeve të 28 dhjetorit, të cilat pritet të kenë një garë të ashpër mes VV-së, LDK-së, PDK-së dhe subjekteve të tjera që po tentojnë të krijojnë aleanca të reja.
