Pas 16 vitesh nën drejtimin e koalicionit të partive shqiptare, Komuna e Kërçovës kalon sërish në duart e VMRO-DPMNE-së.
Kandidati i kësaj partie, Aleksandar Jovanovski, ka fituar në raundin e dytë të zgjedhjeve lokale, duke mposhtur Fatmir Deharin, kandidatin e Aleancës Kombëtare për Integrim (AKI) dhe kryetarin aktual të komunës.
Sipas rezultateve të para jozyrtare, Jovanovski ka siguruar një epërsi prej rreth 2.000 votash, duke shënuar një fitore të thellë që përbën një ndryshim historik në balancat politike të kësaj komune me shumicë shqiptare.
Në zgjedhjet e mëparshme, të mbajtura në vitin 2021, Dehari kishte mposhtur pikërisht Jovanovskin, duke ruajtur atëherë Kërçovën në duart e shqiptarëve. Por këtë herë, përmbysja e rezultatit tregon për një mobilizim të madh të elektoratit maqedonas dhe një pjesëmarrje më të ulët të votuesve shqiptarë, përfshirë edhe ata nga diaspora.
Burime nga terreni theksojnë se pjesa më e madhe e votave vendimtare për Jovanovskin kanë ardhur nga vendbanimet maqedonase të komunës, ndërsa votat shqiptare nuk arritën të balancojnë diferencën.
Fitorja e Jovanovskit shënon fundin e një periudhe 16-vjeçare të drejtimit shqiptar në Kërçovë, që kishte nisur me udhëheqjen e Fatmir Deharit dhe mbështetjen e vazhdueshme të elektoratit shqiptar në disa palë zgjedhje radhazi.
Në katër vitet e ardhshme, Komuna e Kërçovës do të drejtohet nga një përfaqësues i VMRO-DPMNE-së, ndërsa ky rezultat pritet të ketë ndikim të ndjeshëm në raportet politike ndërmjet komuniteteve dhe partive kryesore në Maqedoninë e Veriut.
