Izraeli po përballet me një valë të re zemërimi publik lidhur me luftën në Gaza. Të dielën, qindra mijëra qytetarë dolën në rrugë në protestën më të madhe dhe më të ashpër që nga nisja e konfliktit 22 muaj më parë. Organizatorët, përfaqësues të familjeve të pengjeve të mbajtura në Gaza, kërkuan arritjen e një marrëveshjeje urgjente për lirimin e tyre.
Protestuesit u mblodhën në dhjetëra lokacione – përfshirë jashtë shtëpive të politikanëve, selitë ushtarake dhe autostradat kryesore. Ata bllokuan korsitë, ndezën zjarre dhe kërkuan fundin e luftës. Shumë biznese, përfshirë restorante dhe teatro, u mbyllën në shenjë solidariteti. Policia njoftoi për arrestimin e 38 personave.
Një pjesë e zemërimit lidhet edhe me planet e qeverisë për një ofensivë të re ushtarake në zonat më të populluara të Gazës. Shumë izraelitë druajnë se kjo mund të rrezikojë jetën e pengjeve të mbetura, nga të cilët besohet se vetëm 20 janë ende gjallë. “Ne jetojmë mes një organizate terroriste që mban fëmijët tanë dhe një qeverie që refuzon t’i lirojë për arsye politike”, tha Yehuda Cohen, babai i një pengu.
Edhe disa ish-udhëheqës të ushtrisë dhe inteligjencës po i bashkohen thirrjes për një marrëveshje që do të ndalte luftimet.
Netanyahu nën presion të dyfishtë
Kryeministri Benjamin Netanyahu vazhdon të kundërshtojë çdo marrëveshje që do të linte Hamasin në pushtet. Ai paralajmëroi se përfundimi i luftës pa mposhtur Hamasin do të siguronte përsëritjen e ngjarjeve tragjike të 7 tetorit 2023, kur rreth 1.200 persona u vranë nga sulmet e Hamasit.
Por presioni mbi të është në rritje. Partnerët e ekstremit të djathtë në kabinet kanë kërcënuar se do të rrëzojnë qeverinë nëse arrihet një armëpushim që nuk shkatërron Hamasin. Ministri i Financave, Bezalel Smotrich, e cilësoi protestën e së dielës si “një fushatë të dëmshme që i shërben Hamasit dhe rrezikon sigurinë e Izraelit”.
Gaza: 17 të vrarë në radhët për ndihma
Ndërkohë, në Gaza, të paktën 17 persona u vranë të dielën, përfshirë nëntë që prisnin për kamionë ndihmash të OKB-së pranë korridorit Morag. Dëshmitarët thanë se ushtarët izraelitë hapën zjarr për të shpërndarë turmat.
“Ose duhet ta marr këtë rrezik, ose të shoh familjen time të vdesë nga uria”, tha Hamza Asfour, një nga banorët e plagosur lehtë.
Fondacioni Humanitar i Gazës, që menaxhon shpërndarjen e ndihmave me mbështetjen e SHBA-së dhe Izraelit, deklaroi se nuk ka pasur të shtëna “në apo afër” pikave të tij zyrtare të shpërndarjes, të cilat ndodhen në zona nën kontroll ushtarak.
Kriza humanitare në territorin palestinez po thellohet çdo ditë, ndërsa Izraeli përballet me tensione të brendshme gjithnjë e më të mëdha mbi rrugën që duhet ndjekur në këtë luftë të gjatë e të përgjakshme.
