Zyra e Rregullatorit për Energji (ZRrE) ka mbajtur sot një mbledhje të jashtëzakonshme, ku ka miratuar dy vendime të rëndësishme në kuadër të procesit të liberalizimit të tregut të energjisë elektrike në Kosovë.
Në këtë mbledhje, Bordi i ZRrE-së ka vendosur që t’i lëshojë licencë për furnizim me energji elektrike kompanisë VOLTKOS Sh.p.k., duke i hapur rrugë kështu hyrjes së saj në tregun e brendshëm dhe zgjerimit të ofertës për konsumatorët kosovarë.
Po ashtu, ZRrE ka marrë vendim për njohjen e licencës së kompanisë AI EnergyX – Dega në Kosovë, duke vepruar sipas parimit të reciprocitetit. Ky hap i mundëson kësaj ndërmarrjeje që të operojë në përputhje me legjislacionin vendor dhe të kontribuojë në rritjen e konkurrencës në sektorin energjetik.
“Vendimet e marra sot përbëjnë një tjetër hap konkret drejt një tregu më të hapur dhe konkurrues të energjisë elektrike në Kosovë”, thuhet në njoftimin zyrtar të ZRrE-së.
Procesi i liberalizimit të tregut të energjisë është pjesë e përpjekjeve të institucioneve për të përmirësuar efikasitetin, transparencën dhe cilësinë e shërbimeve për konsumatorët, si dhe për të tërhequr investime të reja në sektorin energjetik.
