Policia e Kosovës, në bashkëpunim me njësitë e KFOR-it dhe EULEX-it, ka sekuestruar një sasi të konsiderueshme armatimi gjatë një bastisjeje në fshatin Vallaq të Zveçanit. Sipas njoftimit zyrtar, armët dhe municioni – përfshirë granata dore dhe armë të tipit “zolla” – ishin të fshehura në gypa plastikë nën tokë, në një stallë kuajsh.
Në dy bastisje të tjera të zhvilluara në Mitrovicë të Veriut dhe në Zveçan, janë gjetur jelekë antiplumb, fishekë dhe pajisje të dyshimta teknologjike, përfshirë 14 kartela grafike.
Në vendin e ngjarjes ka dalë edhe prokurori i rastit, ndërsa hetimet po vazhdojnë nga Prokuroria Themelore në Mitrovicë. Deri më tani nuk ka të arrestuar, por autoritetet kanë identifikuar një person me interes për intervistim.
