Burime të sigurta brenda institucionit kanë konfirmuar se Fatos Ferizi dyshohet se ka marrë ryshfet nga një kandidat, me qëllim që ky i fundit të kalonte testin teorik për patentë-shofer pa meritë.
Sipas njoftimit të Prokurorisë Themelore në Prishtinë, zyrtari i ndaluar, me qëllim përfitimi të kundërligjshëm pasuror për vete, ka kërkuar dhe pranuar një shumë të caktuar parash në formë të ryshfetit. Pas dhënies së shumës së kërkuar, kandidati ka kaluar testin teorik.
Ndaj të dyshuarit është caktuar masa e ndalimit prej 48 orësh. Prokuroria ka bërë të ditur se, brenda afateve ligjore, Prokurori i Shtetit do të ndërmarrë veprimet e nevojshme procedurale lidhur me këtë rast.
