Presidenti i Autoritetit Palestinez, Mahmoud Abbas, ka bërë thirrje për lirimin e pengjeve të mbajtura nga Hamasi, duke akuzuar këtë grup se i ka dhënë Izraelit një justifikim për veprimet e tij në Gaza. Ai deklaroi se Izraeli po i përdor pengjet për të justifikuar “krimet kundër popullit palestinez” dhe se është vetë populli i tij ai që po paguan çmimin më të lartë.
“Unë jam ai që po paguaj çmimin, populli ynë po e paguan atë, jo Izraeli”, tha Abbas, sipas agjencisë franceze të lajmeve AFP.
Abbas, i cili udhëheq Autoritetin Palestinez në Bregun Perëndimor të pushtuar, e cilësoi aktin e marrjes së pengjeve nga Hamasi më 7 tetor 2023 si një justifikim për “pushtimin kriminal” të Izraelit.
Që nga viti 2006, Hamasi kontrollon Gazën, ndërsa Autoriteti Palestinez ka mbetur në pushtet vetëm në Bregun Perëndimor. Marrëdhëniet mes dy grupeve kryesore palestineze – Fatah dhe Hamas – janë të tensionuara prej vitesh, me akuza të ndërsjella për minimin e unitetit palestinez dhe bashkëpunim me Izraelin.
Ndërkohë, situata humanitare në Rripin e Gazës vazhdon të përkeqësohet. Ministrat e Jashtëm të Gjermanisë, Francës dhe Mbretërisë së Bashkuar i kanë bërë thirrje Izraelit që të rivendosë menjëherë rrjedhën e ndihmave humanitare.
“Ndihma humanitare nuk duhet të përdoret kurrë si mjet politik”, thuhet në deklaratën e përbashkët të tyre, duke paralajmëruar për rrezikun e urisë, sëmundjeve dhe vdekjes në enklavën palestineze.
Ministrat gjithashtu kritikuan deklaratat e ministrit izraelit të Mbrojtjes, Israel Katz, që sipas tyre po “politizon ndihmën humanitare”, dhe shprehën kundërshtimin ndaj planeve për një prani izraelite pasluftës në Gaza.
“Territori palestinez nuk duhet të zvogëlohet apo t’i nënshtrohet ndryshimeve demografike”, theksuan ata.
Sakaq, ushtria izraelite vazhdoi operacionet e saj në Gaza. Sipas Mbrojtjes Civile të Gazës, të paktën 17 persona u vranë në sulmet e fundit, përfshirë 11 në qytetin e Gazës, raportoi AFP.
Situata mbetet e tensionuar, me zhvillime politike e ushtarake që thellojnë krizën humanitare dhe sfidat për paqe në rajon.
