Pas më shumë se tre muajsh nga zgjedhjet e 9 shkurtit, deputetët e Kuvendit të Kosovës do të mblidhen sot sërish në përpjekjen e 26-të për konstituimin e legjislaturës së nëntë. Seanca do të nisë në orën 11:00, në një tjetër tentim për të kapërcyer bllokadën politike që ka penguar zgjedhjen e kryetarit të Kuvendit.
Përpjekja e 25-të, e mbajtur të hënën, rezultoi sërish pa sukses. Subjektet politike nuk arritën të propozojnë anëtarë për Komisionin Zgjedhor për zgjedhjen e kryetarit të Kuvendit me votim të fshehtë, duke e pamundësuar kështu formimin e këtij organi vendimtar për ecurinë e mëtejshme të procesit.
Kryesuesi i seancës, Avni Dehari, përsëriti thirrjen ndaj partive parlamentare që të bëjnë propozimet e nevojshme, por ftesa e tij nuk u mor parasysh. Megjithatë, ai hodhi në votim përbërjen e komisionit bazuar në propozimet nga vazhdimet e mëparshme. Nga 104 deputetë të pranishëm, 51 votuan pro, 1 kundër, dhe pa asnjë abstenim – votim i pamjaftueshëm për të kaluar vendimin dhe për ta zhbllokuar situatën.
Ndërsa vendi mbetet pa një Kuvend të konstituuar dhe pa një kryetar të tij, pritet me interes nëse sot do të ketë ndonjë zhvillim të ri që do ta përshpejtojë formimin e institucioneve të reja.
