Kosova do të përballet të mërkurën me mot tipik veror, me temperatura të larta dhe vranësira të pakta lokale. Sipas parashikimeve meteorologjike, termometri do të shënojë rritje të ndjeshme gjatë ditës, me temperaturën maksimale që pritet të arrijë deri në 33°C. Megjithëse pjesa më e madhe e territorit do të mbetet e kthjellët, në zonat e larta malore nuk përjashtohet mundësia për ndonjë rrebesh lokal shiu, të shoqëruar me vetëtima dhe bubullima gjatë pasdites.
Edhe vendet fqinje do të përjetojnë mot të ngjashëm. Në Shqipëri, Maqedoninë e Veriut, Luginën e Preshevës dhe Malin e Zi, dita e mërkurë do të karakterizohet nga moti kryesisht me diell dhe temperatura të larta. Vlerat maksimale të temperaturave do të arrijnë në 34 deri 35°C, veçanërisht në zonat më të nxehta të rajonit.
Kjo valë e të nxehtit pritet të vazhdojë edhe në ditët në vijim, ndaj qytetarëve u rekomandohet të shmangin ekspozimin në diell gjatë orëve të mesditës dhe të konsumojnë mjaftueshëm lëngje për të shmangur dehidratimin.
