Deputetët e zgjedhur më 9 shkurt do të rikthehen sot në Kuvendin e Kosovës, në përpjekjen e tridhjetë me radhë për ta konstituar Legjislaturën e nëntë. Seanca pritet të vazhdojë nën drejtimin e kryesuesit Avni Dehari, me synimin për të përfunduar pikën e mbetur të rendit të ditës – zgjedhjen e kryetarit të Kuvendit.
Të hënën, punimet e seancës konstituive vijuan pa ndonjë përparim domethënës, teksa ende mungon bashkëpunimi i plotë ndërmjet partive politike për të formuar Komisionin Zgjedhor që do të mundësojë zgjedhjen e kryetarit me votim të fshehtë.
Kryesuesi Dehari përsëriti thirrjen ndaj subjekteve politike që ende nuk kanë propozuar anëtarë për këtë komision – konkretisht PDK, LDK, Lista Serbe dhe AAK-Nisma – që ta bëjnë këtë në mënyrë që të zhbllokohet procesi. Megjithatë, asnjë përfaqësues nga këto parti nuk u deklarua lidhur me këtë kërkesë.
Në mungesë të propozimeve të reja, përbërja e Komisionit me anëtarët e propozuar gjatë vazhdimeve të mëparshme u hodh në votim.
Procesi i stërzgjatur i konstituimit të Kuvendit ka ngritur shqetësime për funksionalitetin institucional dhe përfaqësimin demokratik, ndërsa vëmendja sot është përqendruar te mundësia për zhbllokimin e situatës pas muajsh paqartësie politike.
