Zëvendësministri i Jashtëm rus, Sergei Ryabkov, ka paralajmëruar sot se ndihma e drejtpërdrejtë ushtarake e Shteteve të Bashkuara për Izraelin mund të çojë në një destabilizim rrënjësor të situatës në Lindjen e Mesme, ku prej gjashtë ditësh po zhvillohet një konflikt midis Iranit dhe Izraelit.
Në të njëjtën linjë, kreu i shërbimit të inteligjencës së jashtme të Rusisë, Sergei Naryshkin, ka vlerësuar se situata midis dy vendeve është kritike dhe kërkon kujdes maksimal.
Në një deklaratë për agjencinë ruse të lajmeve Interfax, Ryabkov theksoi se Shtetet e Bashkuara duhet të shmangin dhënien e ndihmës ushtarake direkte Izraelit, duke paralajmëruar se “ky do të ishte një hap që do ta destabilizonte rrënjësisht të gjithë situatën.”
Më parë, sipas burimeve të brendshme në SHBA, Presidenti Donald Trump dhe ekipi i tij po shqyrtojnë disa opsione, përfshirë edhe bashkëpunimin me Izraelin në sulme kundër objekteve bërthamore iraniane.
