Sipas burimeve të Qendra.info, lideri i Lidhjes Demokratike të Kosovës (LDK), Lumir Abdixhiku, dhe kryetari i Nismës Socialdemokrate, Fatmir Limaj, kanë zhvilluar sot një takim kokë më kokë që ka zgjatur mbi një orë e gjysmë.
Burimet e Qendra.info bëjnë të ditur se në këtë takim është diskutuar gjerësisht për zhvillimet aktuale politike në vend, si dhe për nevojën e gjetjes së një rruge për dalje nga kriza politike që po e përshkon vendin. Takimi është vlerësuar si konstruktiv dhe i zhvilluar në një atmosferë pozitive.
Një tjetër pikë e rëndësishme e diskutimit, sipas të njëjtave burime, ka qenë përgatitja për zgjedhjet lokale që pritet të mbahen, me theks të veçantë në kryeqytet. Abdixhiku dhe Limaj, thuhet se kanë shqyrtuar mundësinë e një bashkëpunimi të përbashkët në Prishtinë, që shihet si një prej garave më strategjike në skenën lokale.
Edhe pse nuk është bërë publik ndonjë dakordim konkret, takimi shihet si pjesë e një faze koordinimi ndërmjet opozitës për të forcuar pozicionin në zhvillimet e ardhshme elektorale.
As LDK-ja, e as Nisma nuk kanë dhënë ndonjë deklaratë zyrtare pas takimit, duke ruajtur diskrecionin për përmbajtjen e diskutimeve. Ndërkohë, pritet që ditëve në vijim të ketë më shumë qartësi lidhur me hapat që mund të ndërmerren nga këto dy parti në kuadër të zhvillimeve politike dhe zgjedhore.
