Një takim urgjent i Këshillit të Sigurimit të Kombeve të Bashkuara u shndërrua në skenë përplasjeje të ashpër diplomatike mes Iranit dhe Izraelit, ndërsa konflikti mes dy vendeve po hyn në javën e dytë. Ambasadorët e të dyja palëve akuzuan njëri-tjetrin për shkelje të ligjit ndërkombëtar dhe deklaruan se do të vazhdojnë veprimet ushtarake.
Ambasadori i Iranit në OKB, Amir Saeid Iravani, deklaroi se vendi i tij ka të drejtë të mbrohet dhe do të vazhdojë ta ushtrojë këtë të drejtë “për aq kohë sa të jetë e nevojshme”. Ai i akuzoi Izraelin dhe aleatët e tij për ndërmarrje të sulmeve të paligjshme dhe kërkoi nga anëtarët e Këshillit të Sigurimit që të ndërmarrin masa për të ndalur agresionin.
Në përgjigje të tij, ambasadori i Izraelit në OKB, Danny Danon, reagoi ashpër, duke e akuzuar Iravanin se po luan rolin e viktimës në mënyrë të rreme.
“Si guxon të kërkosh mbrojtje ndërkombëtare kur vetë po ushqen një agjendë gjenocidale? Nuk je viktimë, as diplomat. Je një ujk i veshur si diplomat,” deklaroi Danon.
Ai theksoi se Izraeli nuk do të ndalet derisa, sipas tij, kërcënimi bërthamor nga Irani të eliminohet dhe makineria e luftës të çarmatosej. Sipas tij, sulmet izraelite ishin të domosdoshme dhe të ndërmarra në “dritaren e fundit të mundshme” për të parandaluar sigurimin e armëve bërthamore nga Irani.
Përballë retorikës përshkallëzuese, Sekretari i Përgjithshëm i OKB-së, António Guterres, paralajmëroi për rrezikun real të një konflikti të gjerë rajonal dhe u bëri thirrje palëve për përmbajtje të menjëhershme.
“Zgjerimi i këtij konflikti mund të ndezë një zjarr që askush nuk do të mund ta kontrollojë. Bëj thirrje për ndalim të menjëhershëm të luftimeve dhe kthim në negociata serioze,” deklaroi Guterres.
Pavarësisht thirrjeve për qetësi, tensionet mbeten të larta, ndërsa komuniteti ndërkombëtar vëzhgon me shqetësim zhvillimet e fundit në Lindjen e Mesme.
