Pas një konflikti të gjatë tregtar që tensionoi marrëdhëniet ekonomike globale, Shtetet e Bashkuara të Amerikës dhe Kina kanë arritur një marrëveshje për lehtësimin e tarifave dhe kufizimeve mbi metalet e rralla, duke hapur rrugën për normalizimin e tregtisë dypalëshe dhe përfitime edhe për kompanitë evropiane.
Lajmi është konfirmuar nga Ministri amerikan i Tregtisë, Howard Lutnick, në një intervistë për agjencinë financiare Bloomberg, ku theksoi se marrëveshja është tashmë e nënshkruar dhe përfshin furnizimin e SHBA-së me metale të rralla nga Kina, ndërkohë që Uashingtoni do të heqë një sërë masash kufizuese ndaj eksportuesve kinezë.
“Kina do të shqyrtojë aplikimet për eksport për produktet e kontrolluara dhe do të miratojë ato që janë në përputhje me rregulloret,” thuhet në deklaratën e Ministrisë së Tregtisë në Pekin.
Trumpi konfirmon, por pa detaje
Presidenti i SHBA-së, Donald Trump, gjatë një aktiviteti në Shtëpinë e Bardhë, konfirmoi arritjen e marrëveshjes por nuk ofroi hollësi shtesë, duke shtuar se “vetëm dje nënshkruam me Kinën”. Ai shtoi gjithashtu se mund të ketë në të ardhmen “një marrëveshje të madhe” me Indinë.
Një konflikt që tronditi ekonominë globale
Konflikti tregtar mes dy fuqive më të mëdha ekonomike në botë nisi me rritjen e tarifave ndëshkuese nga SHBA ndaj produkteve kineze deri në 145%, ndërsa Kina reagoi me tarifa deri në 125% dhe vendosi kontrolle të eksportit për metalet e rralla industriale, materiale të cilat janë të pazëvendësueshme në sektorët e teknologjisë dhe mbrojtjes.
Ky përshkallëzim ndikoi negativisht edhe në ekonominë e Bashkimit Evropian, veçanërisht në industri kyçe si automobilët dhe inxhinieria mekanike, të cilat varen nga furnizimi me metale të rralla për prodhimin e motorëve elektrikë, sensorëve dhe pajisjeve të tjera teknologjike.
Marrëveshja lehtëson presionin ndërkombëtar
Me marrëveshjen e re, Kina ka premtuar përshpejtimin e procedurave për licencat e eksportit, ndërsa SHBA pritet të heqë kufizimet për eksportin e teknologjive të avancuara, përfshirë softuerë të gjysëmpërçuesve dhe pajisje të aviacionit.
Kjo lëvizje shihet si një hap i rëndësishëm drejt stabilizimit të tregtisë ndërkombëtare, ndërkohë që palët mbeten të kujdesshme për implementimin e plotë të marrëveshjes.
📌 Burimi: Deutsche Welle (DW)
