Shtëpia e Bardhë po shqyrton mundësinë e organizimit të një takimi trepalësh mes presidentëve të SHBA-së, Rusisë dhe Ukrainës në kryeqytetin hungarez, Budapest, si hap të radhës në përpjekjet për t’i dhënë fund luftës shumëvjeçare në Ukrainë. Lajmi është konfirmuar nga një zyrtar i administratës Trump dhe një burim tjetër i afërt me këtë proces.
Shërbimi Sekret amerikan tashmë ka nisur përgatitjet për samitin në Hungari, vend i udhëhequr nga kryeministri Viktor Orbán, i cili ka ruajtur marrëdhënie të afërta me Donald Trump-in që nga mandati i tij i parë presidencial. Zëdhënësit e Shtëpisë së Bardhë nuk kanë dhënë ende një koment zyrtar.
Megjithëse Shërbimi Sekret zakonisht shqyrton disa lokacione para marrjes së vendimit final, Budapesti po shihet si opsioni kryesor, sipas burimeve që kërkuan anonimitet për shkak të natyrës konfidenciale të bisedimeve. Nga ana tjetër, presidenti rus Vladimir Putin ka preferuar Moskën, ndërsa presidenti francez Emmanuel Macron ka sugjeruar Gjenevën si vend më të përshtatshëm. Në ndërkohë, edhe Zvicra ka ofruar garanci për “imunitet” ndaj Putinit nëse bisedimet zhvillohen atje.
Megjithatë, për Kievin, Hungaria shihet si zgjedhje e pakëndshme për shkak të kujtesës së Memorandumit të Budapestit të vitit 1994, ku SHBA-të, Britania e Madhe dhe Rusia garantuan sovranitetin e Ukrainës në këmbim të heqjes dorë nga armët bërthamore. Pushtimi i Ukrainës nga Rusia në vitin 2014 e bëri këtë marrëveshje të pavlefshme, pasi nënshkruesit nuk ofruan mbrojtje ushtarake kundër agresionit rus.
