Dashuria për sportin e luftës e ka rikthyer sërish në skenë Frankie Edgarin, ish-kampionin e UFC-së dhe anëtar të Sallës së Famës. Sipas raportimeve të ESPN, Edgar ka nënshkruar me Bare Knuckle Fighting Championship (BKFC) dhe do të rikthehet në garë më 4 tetor, përballë Jimmie Rivera-s, një tjetër ish-luftëtar i UFC-së.
Ndeshja do të zhvillohet në New Jersey, shtetin e lindjes së Edgarit.
“Jam shumë i emocionuar që do të kthehem në gara, veçanërisht këtu në Jersey,” tha Edgar pas nënshkrimit të marrëveshjes.
Mbështetje nga Conor McGregor
Conor McGregor, ish-kampion i dy divizioneve në UFC dhe pronar i pjesshëm i BKFC-së, përshëndeti rikthimin e Edgarit me një postim në rrjetet sociale.
Karriera e Frankie Edgar
Edgar u bë kampion bote në vitin 2010, kur mundi BJ Penn në peshën e lehtë. Ai ka garuar gjithashtu për titullin në peshat pupël kundër Jose Aldo dhe Max Holloway. Pas një karriere të shkëlqyer, në vitin 2024, vetëm dy vjet pas tërheqjes, u fut në Sallën e Famës së UFC-së.
Karta BKFC 82
Eventi i madh BKFC 82 do të mbahet në Qendrën Prudential. Përveç rikthimit të Edgarit, në ndeshjen kryesore do të përballen Mike Perry dhe Jeremy Stephens, një tjetër duel spektakolar mes ish-yjeve të UFC-së.
