Produktet e kanabisit sot janë dukshëm më të forta se vetë bima, duke ngritur shqetësime mes studiuesve dhe politikëbërësve për efektet e tyre në shëndet.
Një analizë e gjerë e re ka zbuluar se produktet e kanabisit me përqendrim të lartë mund të rrisin rrezikun për psikozë, skizofreni dhe varësi, shkruan burimi Euronews Health transmeton Qendra.info.
Edhe pse kanabisi mbetet kryesisht i paligjshëm në Bashkimin Evropian, vlerësohet se rreth 4.3 milionë njerëz e përdorin pothuajse çdo ditë – qoftë duke e tymosur marihuanën, duke konsumuar ushqime të përpunuara si çokollatat apo karamelet me kanabis, apo duke përdorur nëpërmjet koncentratit si vaji i hashashit.
Përbërësi kryesor i përbashkët është delta-9-tetrahidrokanabinoli (THC), substanca psikoaktive që i jep ndjesinë e “euforisë” përdoruesve.
Por produktet e kanabisit janë prirur të jenë shumë më të fuqishme sesa vetë bima. Sipas Agjencisë së Bashkimit Evropian për Drogat (EUDA), në vitin 2023, mesatarja e përqendrimit të THC-së në rrëshirën e kanabisit ishte 23%, krahasuar me 11% tek kanabisi bimor.
Kjo ka ngjallur prej kohësh shqetësime për pasojat shëndetësore të këtyre përqendrimeve të larta, duke shtyrë një ekip studiuesish amerikanë të analizojë rreziqet për shëndetin mendor që lidhen me produktet me mbi 5 miligramë ose 10% THC për dozë.
Studiuesit analizuan të dhënat nga 99 studime të botuara mes viteve 1977 dhe 2023, që përfshinin mbi 220,000 persona.
Përdorimi i THC-së me përqendrim të lartë u lidh me shfaqjen e psikozës dhe skizofrenisë, sidomos brenda 12 orëve pas konsumimit – diçka që studiuesit e cilësuan “shqetësuese”.
Gjithashtu, u vu re lidhje mes përdorimit të THC-së me përqendrim të lartë dhe çrregullimit nga përdorimi i kanabisit, sipas rishikimit të botuar në revistën “Annals of Internal Medicine”.
Sipas EUDA, personat që përdorin kanabis shpesh dhe për periudha të gjata kanë më shumë gjasa të zhvillojnë probleme shëndetësore. Përdorimi i tij mund të shkaktojë ose të përkeqësojë sëmundjet e frymëmarrjes, varësinë dhe simptomat psikotike.
