Sipas Sekretarit të Shtetit të SHBA-së, Marco Rubio, bashkëpunimi i ngushtë mes Izraelit, Shteteve të Bashkuara dhe ndërmjetësve të armëpushimit në Gaza ka parandaluar një sulm të mundshëm të Hamasit që do të kishte shkelur marrëveshjen e armëpushimit me Izraelin.
Rubio deklaroi se inteligjenca amerikane kishte marrë sinjale të besueshme për një plan të Hamasit që synonte civilët palestinezë në territorin e Gazës, duke rrezikuar prishjen e marrëveshjes.
“Qëllimi është të identifikohet kërcënimi përpara se të ndodhë,” tha Rubio, duke theksuar se informacioni u ndarë menjëherë me vendet ndërmjetëse dhe se falë kësaj, sulmi u ndal në kohë.
Duke folur gjatë fluturimit nga Izraeli në Katar, Rubio nënvizoi se bashkërendimi mes agjencive të inteligjencës dhe diplomacisë amerikane po luan një rol kyç në ruajtjen e armëpushimit dhe në mbrojtjen e popullatës civile në Gaza.
Në kuadër të fazës së parë të marrëveshjes për paqe, Hamasi ka liruar disa pengje të gjallë dhe ka dorëzuar trupat e disa të vdekurve.
Izraeli, nga ana e tij, ka bërë të qartë se pa dorëzimin e plotë të trupave të pengjeve nuk do të fillojë faza e dytë e procesit, ndërsa Hamasi ka kërkuar më shumë kohë për kërkimet në rrënojat e zonave të bombarduara.
Marrëveshja, e mbështetur nga SHBA-ja dhe vendet partnere të Lindjes së Mesme, synon të sigurojë stabilitet të qëndrueshëm në Gaza, duke krijuar bazat për bisedime politike që mund të çojnë në zgjidhje afatgjatë të konfliktit izraelito-palestinez.
Falë sinjalizimeve të hershme nga inteligjenca amerikane, një sulm i mundshëm i Hamasit është shmangur, duke mbajtur të paprekur armëpushimin që mbetet shtylla e vetme e brishtë e paqes në Gaza.
Ndërkohë, SHBA-ja po intensifikon përpjekjet diplomatike, me Rubio në qendër të përpjekjeve për të ruajtur armëpushimin dhe për të hapur rrugën drejt fazës së dytë të planit të paqes.
