Gjykata Supreme e Kosovës ka refuzuar padinë e ngritur nga Rrjeti i Femrave për Zhvillim Profesional “Arrita” kundër Ministrisë së Arsimit, Shkencës, Teknologjisë dhe Inovacionit (MASHTI), duke konfirmuar se ministria ka të drejtë ligjore të përcaktojë rregullat për uniformat shkollore.
Padia kishte kërkuar shfuqizimin e nenit 3, paragrafi 1, nënparagrafi 1.13 të Udhëzimit Administrativ Nr. 06/2014, që ndalon bartjen e uniformave fetare në shkolla të mesme publike. Organizata “Arrita” pretendonte se ky udhëzim shkelte të drejtat kushtetuese të vajzave që mbajnë shaminë (mbulesën islame) dhe se kufizimet e tilla mund të vendosen vetëm me ligj, jo me akte nënligjore.
Por Gjykata Supreme ka vlerësuar se Udhëzimi Administrativ është në përputhje me ligjin, duke theksuar se Ministria e Arsimit ka kompetencë të qartë ligjore për të caktuar rregulla mbi sjelljen dhe uniformën e nxënësve, sipas Ligjit për Arsimin Parauniversitar dhe Ligjit për Arsimin dhe Aftësimin Profesional.
Në arsyetimin e vendimit thuhet se:
“Ministria e Arsimit, Shkencës dhe Teknologjisë ka autorizim të qartë ligjor për të përcaktuar rregulla për sjelljen e nxënësve, përfshirë edhe veshjen – uniformën. Prandaj, ndalimi i uniformës fetare në shkolla është në përputhje me hierarkinë ligjore dhe nuk mund të shfuqizohet.”
Gjykata Supreme ka kujtuar gjithashtu se liria fetare nuk është absolute dhe mund të kufizohet në shoqëri demokratike për të ruajtur neutralitetin shtetëror dhe harmoninë ndërfetare, duke iu referuar edhe aktvendimit të Gjykatës Kushtetuese nr. KI 36/11 të vitit 2011 dhe praktikës së Gjykatës Evropiane për të Drejtat e Njeriut.
Në përfundim, Gjykata thekson se rregullat e miratuara nga MASHTI nuk tejkalojnë kompetencat ligjore dhe janë në përputhje me ligjin dhe Kushtetutën, ndaj padia është refuzuar si e pabazuar.
Ky vendim rikthen debatin mbi balancimin e lirive fetare me rregullat shtetërore të arsimit publik, një çështje që ka shkaktuar reagime të forta në opinionin publik viteve të fundit.
