Kancelari gjerman Friedrich Merz zhvilloi një takim zyrtar me presidentin turk Rexhep Taip Erdoğan, në një vizitë që synonte forcimin e marrëdhënieve gjermano-turke. Takimi u vlerësua si një hap i rëndësishëm diplomatik, por u karakterizua edhe nga mospërputhje të dukshme në qëndrimet për konfliktin në Lindjen e Mesme.
Në konferencën e përbashkët për shtyp, Merz theksoi se Turqia është një partner strategjik i pazëvendësueshëm për Gjermaninë, duke nënvizuar lidhjet e ngushta sociale, ekonomike dhe ushtarake midis dy vendeve. “Të dyja vendet janë anëtare të NATO-s dhe ndajnë përgjegjësi të përbashkëta për sigurinë në rajon,” tha kancelari gjerman.
Megjithatë, tensionet dolën në pah kur biseda kaloi te konflikti Izrael–Palestinë.
Merz përsëriti se Gjermania do të qëndrojë “me vendosmëri në anën e Izraelit”, ndonëse shtoi se kjo nuk nënkupton mbështetje të pakushtëzuar për çdo vendim të qeverisë izraelite.
Nga ana tjetër, Erdogani e akuzoi Izraelin për “gjenocid” dhe theksoi se mbi 60,000 civilë janë vrarë në Rripin e Gazës, duke dënuar ashpër bllokadën humanitare ndaj palestinezëve.
Temat e tjera të diskutimit përfshinë luftën në Ukrainë, ku Turqia po përpiqet të luajë rol ndërmjetësues, dhe marrëveshjet për migracionin. Merz kërkoi mbështetjen e Turqisë për riatdhesimin e migrantëve të paligjshëm dhe theksoi nevojën për një bashkëpunim më të ngushtë në këtë fushë.
Në fund, kancelari gjerman preku edhe çështjen e të drejtave të njeriut në Turqi, duke thënë se “në disa raste, situata nuk përputhet me parimet e sundimit të ligjit”. Ai konfirmoi se këto shqetësime i janë komunikuar drejtpërdrejt presidentit Erdoğan gjatë takimit.
Vizita e Merzit në Ankara shihet si një përpjekje për të rivendosur ekuilibrin në marrëdhëniet e ndërlikuara mes dy vendeve — me tone diplomatike, por me dallime të qarta në pikëpamjet për Lindjen e Mesme dhe të drejtat themelore.
