Dy nëna britanike arritën të vizitonin Shqipërinë për vetëm një ditë, duke shpenzuar më pak para sesa do t’u kushtonte një natë në teatër në Londër – shkruan gazetarja Cyann Fielding për tabloidin britanik “The Sun”.
Stacey Baugh (34 vjeçe) dhe Claire Dukes (41 vjeçe) udhëtuan nga Chesterfield drejt Tiranës, duke blerë bileta vajtje-ardhje me kompaninë “Ryanair” për vetëm 70 paund secila. Fluturimi i tyre u nis nga Stansted në orën 05:55 dhe mbërriti në kryeqytetin shqiptar në 09:50.
Pas mbërritjes, ato bënë një tur privat prej 60 stërlinash, që përfshinte vizitën në liqenin e Bovillës, malin e Dajtit, malin e Gamtit dhe një xhiro mbrëmjeje në Tiranë.
“Ishte një udhëtim fantastik. Bovilla ka një ngjyrë të mrekullueshme blu të gjelbër. Rruga ishte e këndshme dhe pamjet mahnitëse”, – tha Stacey për “The Sun”.
“Fluturimi mbi malet shqiptare në perëndim të diellit ishte fundi perfekt i ditës.”
Dy mikeshat shijuan edhe ushqimet tradicionale shqiptare – qofte, trileçe, sallatë çezar dhe tavë dheu – për më pak se 40 paund në një restorant panoramik në majë të Dajtit.
Në total, udhëtimi i tyre njëditor në Shqipëri kushtoi rreth 200 paund, më pak se një mbrëmje në teatrot e Londrës.
“Vetëm treni për në punë më kushton mbi 100 paund. Ndërsa një natë në teatër me benzinë, parkim dhe biletë arrin deri në 200 paund. Në Shqipëri patëm një ditë të plotë, eksploruam tre male dhe u kënaqëm pafund – për të njëjtin çmim”, – shtoi Stacey.
Dy nënat kanë krijuar një rutinë të veçantë: udhëtime ditore në vende të ndryshme evropiane. Ato kanë vizituar më parë Suedinë dhe Irlandën, ndërsa për vitin 2026 kanë planifikuar tashmë tri destinacione të tjera – Kopenhagën, Poloninë dhe Luksemburgun.
“Që kur u bëmë prindër, nuk duam të largohemi shumë gjatë nga fëmijët. Udhëtimet njëditore janë perfekte – të japin pushim, përjetime të reja dhe nuk kërkojnë shumë shpenzime”, – përfundon ajo./QENDRA.INFO
