Në pesë bashki të vendit – Vlorë, Berat, Cërrik, Mat dhe Tepelenë – po zhvillohen sot zgjedhjet e pjesshme vendore, ku 334,539 qytetarë me të drejtë vote pritet të zgjedhin kryebashkiakët e rinj.
Sipas Komisionit Qendror të Zgjedhjeve, deri në orën 09:00 kanë votuar 4,444 zgjedhës, që përbën 2.37% të pjesëmarrjes, ndërsa procesi po vijon i qetë dhe pa incidente të rëndësishme në të gjithë territorin.
Në disa qendra votimi (QV) janë shënuar vonesa sporadike, kryesisht për shkak të mungesës së komisionerëve të Partisë Demokratike, si dhe probleme teknike me pajisjet e identifikimit elektronik në Vlorë dhe Cërrik, por çështjet janë zgjidhur me ndërhyrjen e KQZ-së.
Në total, janë hapur 473 qendra votimi, të cilat do të qëndrojnë të hapura deri në orën 18:00. Edhe pse në disa materiale zgjedhore ishte shtypur gabimisht orari deri në 19:00, KQZ ka sqaruar se votimi përfundon në orën e parashikuar me Kod Zgjedhor.
Për mbarëvajtjen e procesit janë angazhuar 612 efektivë policie, të cilët po ruajnë qendrat e votimit dhe sigurinë publike.
Në këtë proces marrin pjesë gjithsej 13 kandidatë për drejtimin e pesë bashkive, ndërsa PS garon me kandidatët e saj zyrtarë. Ndërkohë, PD e Sali Berishës dhe aleatët nuk kanë kandidatë nën siglën e tyre, por kanë shprehur mbështetje për disa kandidatë të pavarur.
Për herë të parë, në Tepelenë po testohet përdorimi i inteligjencës artificiale në numërimin e votave, ku rezultati do të transmetohet në kohë reale online, për t’u krahasuar më pas me numërimin manual të komisionerëve.
Fushata zgjedhore për këto zgjedhje ka kaluar në qetësi të plotë, pa mitingje madhore, pasi as Edi Rama dhe as Sali Berisha nuk morën pjesë në aktivitete publike gjatë saj.
Mandati i kryebashkiakëve që do të zgjidhen sot do të zgjasë deri në pranverën e vitit 2027, kur do të mbahen zgjedhjet e ardhshme vendore në të gjithë vendin.
Numri i votuesve sipas bashkive:
-
Vlorë: 171,895 votues
-
Berat: 82,161 votues
-
Cërrik: 38,724 votues
-
Mat: 29,092 votues
-
Tepelenë: 12,667 votues
