Presidenti i Shteteve të Bashkuara, Donald Trump, ka lënë të kuptohet se tashmë ka marrë një vendim për Venezuelën, pas një jave të mbushur me samite dhe manovra të dukshme ushtarake amerikane në rajon.
Burime për CNN thonë se Trump është informuar për një sërë skenarësh ushtarakë, që variojnë nga sulme të kufizuara ajrore mbi infrastrukturën qeveritare e ushtarake venezueliane, e deri te veprime të drejtpërdrejta kundër presidentit Nicolas Maduro.
“Kam vendosur – po. Nuk mund t’ju them se çfarë, por kam vendosur,” u shpreh Trump për gazetarët gjatë fluturimit me Air Force One, duke lënë të kuptohet se një plan konkret tashmë ekziston.
Prani e përforcuar ushtarake
Ndërkohë, Operacioni “Shtiza Jugore” po shpaloset me intensitet të lartë në Karaibe: më shumë se 15,000 trupa amerikane, anije luftarake, përfshirë aeroplanmbajtësen USS Gerald R. Ford, si dhe dhjetë avionë luftarakë F-35 janë dislokuar në rajon — një shfaqje force që kujton mobilizime të mëdha të Luftës së Ftohtë.
Sipas burimeve, në takimet e fundit në Sallën e Operacioneve të Shtëpisë së Bardhë, presidenti ka shqyrtuar edhe sulme kundër rrjeteve të drogës dhe karteleve brenda territorit venezuelian, me qëllim dobësimin e regjimit të Maduros.
Rreziqe dhe kalkulime politike
Trump thuhet se po peshojnë kostot dhe përfitimet politike të një ndërhyrjeje, pasi çdo humbje ushtarake ose dështim operativ mund të godasë rëndë imazhin e tij si udhëheqës që premtoi ta mbante “Amerikën larg luftërave të pafundme”.
Ndërhyrja, megjithatë, mund t’i jepte atij një fitore të madhe strategjike, duke rrëzuar Maduron dhe duke rritur ndikimin amerikan në Amerikën Latine, veçanërisht në luftën kundër karteleve të drogës dhe emigracionit të paligjshëm.
Maduro kundërpërgjigjet
Nga Karakasi, Nicolas Maduro reagoi me tone të ashpra, duke paralajmëruar se çdo ndërhyrje amerikane do ta shndërronte Venezuelën në “një Gaza, Afganistan ose Vietnam të ri”.
“Ndaloni dorën e atyre që bëjnë thirrje për bombardime dhe luftë në Amerikën e Jugut,” tha ai. “Jo luftës.”
Skepticizëm në Washington
Zyrtarë republikanë dhe anëtarë të administratës, përfshirë zëvendëspresidentin J.D. Vance dhe sekretarin e Mbrojtjes Pete Hegseth, thuhet se janë shprehur me rezervë ndaj një konflikti të ri të zgjatur.
Një ligjvënës republikan komentoi për CNN:
“Populli amerikan nuk e zgjodhi Trumpin për ta futur vendin në një luftë tjetër në Amerikën Latine.”
Ndërkohë, në Venezuelë janë raportuar mobilizime të forcave ushtarake dhe përgatitje për çdo skenar të mundshëm, teksa tensionet mes Uashingtonit dhe Karakasit po arrijnë nivelin më të lartë të dekadës së fundit.
