Presidenti amerikan Donald Trump ka deklaruar se Shtetet e Bashkuara janë gati të ndërmarrin “veprime tokësore” kundër rrjeteve të dyshuara të trafikut të drogës që operojnë nga Venezuela, duke sinjalizuar një përshkallëzim të ri në konfliktin tashmë të tensionuar mes Uashingtonit dhe regjimit të Nicolas Maduros.
Gjatë një video-lidhjeje me anëtarë të shërbimit ushtarak amerikan të enjten, Trump tha se trafikantët tashmë po shmangin transportin detar dhe se veprimet nga toka janë të pashmangshme.
“Njerëzit nuk po duan të dërgojnë më përmes detit. Ne do t’i ndalim edhe nga toka. Toka është më e lehtë – dhe ne do të nisim shumë shpejt,” theksoi presidenti amerikan.
Deri tani, nuk ka një reagim nga qeveria e Venezuelës lidhur me deklaratën e Trump. Administrata e tij ka akuzuar prej kohësh Nicolas Maduron se ka rol të drejtpërdrejtë në rrjedhën e drogës së paligjshme që, sipas Uashingtonit, po “vret amerikanë”. Maduro i ka mohuar kategorikisht këto akuza.
ShBA me prani të shtuar ushtarake në Karaibe
Forcat amerikane në rajon janë përqendruar prej muajsh në operacione kundër narkotikëve, megjithëse dislokimi i trupave dhe pajisjeve ushtarake është shumë më i madh se ai i zakonshmi për misione të tilla. Që nga shtatori, ushtria amerikane ka kryer të paktën 21 sulme ndaj anijeve të dyshuara në Karaibe dhe Paqësor, duke neutralizuar të paktën 83 persona.
Spekulimet për një aksion të ri janë shtuar veçanërisht pasi SHBA ka rritur prani tokësore dhe detare në zonë, në një periudhë kur marrëdhëniet Uashington–Karakas janë përkeqësuar ndjeshëm.
Operacioni i ri, sinjal i mundshëm i përshkallëzimit
Analistët paralajmërojnë se paralajmërimi i Trump për veprime tokësore mund të sinjalizojë një fazë të re të presionit amerikan ndaj regjimit të Maduros, duke çuar potencialisht drejt përplasjeve direkte në territorin e Venezuelës ose në zona kufitare.
SHBA ndërkohë e ka cilësuar luftën kundër trafikimit të drogës si çështje të sigurisë kombëtare, duke e lidhur drejtpërdrejt me destabilizimin rajonal dhe rritjen e vdekjeve nga substancat e paligjshme në territorin amerikan.
