Forcat e Mbrojtjes së Izraelit (IDF) kanë njoftuar se Irani ka lëshuar raketa drejt territorit izraelit si kundërpërgjigje ndaj sulmeve të përbashkëta të kryera nga Shtetet e Bashkuara të Amerikës dhe Izraeli mëngjesin e së shtunës.
Sipas ushtrisë izraelite, pas identifikimit të raketave të lëshuara nga Irani janë aktivizuar sirenat e alarmit në disa zona të vendit për të paralajmëruar qytetarët për rrezikun.
IDF ka bërë thirrje që qytetarët të ndjekin me përpikëri udhëzimet e Komandës së Frontit të Brendshëm, ndërsa Forcat Ajrore të Izraelit kanë nisur operacionet për të interceptuar raketat dhe për të neutralizuar kërcënimet.
“Pak më parë u aktivizuan sirenat në disa zona të vendit pas identifikimit të raketave të lëshuara nga Irani drejt Izraelit. Publiku kërkohet të ndjekë udhëzimet e Komandës së Frontit të Brendshëm”, thuhet në njoftimin e IDF.
Trump konfirmon operacionet ushtarake
Ndërkohë, presidenti amerikan Donald Trump konfirmoi se operacione të mëdha ushtarake kundër Iranit janë duke u zhvilluar.
Ai deklaroi se qëllimi i operacionit është eliminimi i kërcënimeve që, sipas tij, regjimi iranian paraqet për SHBA-në dhe aleatët e saj.
“Ushtria e Shteteve të Bashkuara po zhvillon një operacion masiv për të parandaluar këtë diktaturë radikale nga kërcënimi ndaj Amerikës dhe interesave tona të sigurisë kombëtare”, tha Trump.
Presidenti amerikan gjithashtu akuzoi Teheranin se po përpiqet të rindërtojë programin bërthamor dhe paralajmëroi se industria iraniane e raketave do të goditet.
Ai u bëri thirrje edhe qytetarëve iranianë të qëndrojnë në strehë për shkak të rrezikut nga bombardimet, ndërsa pranoi se operacioni mund të ketë edhe kosto njerëzore për forcat amerikane.
Tensionet në Lindjen e Mesme janë përshkallëzuar ndjeshëm pas këtyre zhvillimeve, duke rritur frikën për një konflikt më të gjerë në rajon.
