Presidenti i Shtetet e Bashkuara të Amerikës, Donald Trump, njoftoi se ushtria amerikane ka nisur “operacione të mëdha luftarake” kundër Iranit, duke përshkallëzuar ndjeshëm tensionet në Lindjen e Mesme.
Në një video të publikuar në platformën Truth Social, Trump tha se sulmet janë pjesë e një operacioni “masiv dhe të vazhdueshëm” kundër regjimit në Teheran, pasi sipas tij Irani refuzoi thirrjet e Uashingtonit për të ndaluar zhvillimin e armëve bërthamore.
“Ne do të shkatërrojmë raketat e tyre dhe do të rrafshojmë industrinë e tyre të raketave”, deklaroi Trump, duke shtuar se objektiv i operacionit janë bazat e raketave dhe marina iraniane.
Netanyahu konfirmon operacionin e përbashkët
Kryeministri i Izraeli, Benjamin Netanyahu, konfirmoi se operacioni është kryer në koordinim mes SHBA-së dhe Izraelit.
Sipas tij, sulmi synon të eliminojë “kërcënimin ekzistencial” që paraqet regjimi iranian dhe të ndalojë mundësinë që Teherani të pajiset me armë bërthamore.
Menjëherë pas njoftimit, ushtria izraelite raportoi se Irani ka lëshuar raketa drejt territorit izraelit, ndërsa sistemet mbrojtëse ajrore janë aktivizuar për të interceptuar sulmet.
Trump i drejtohet popullit iranian
Në mesazhin e tij tetëminutësh, presidenti amerikan iu drejtua drejtpërdrejt qytetarëve iranianë, duke u bërë thirrje të qëndrojnë në shtëpi për shkak të bombardimeve dhe duke sugjeruar se momenti mund të çojë në ndryshime politike në vend.
“Ora e lirisë suaj është afër”, tha Trump, duke shtuar se pas përfundimit të operacionit qytetarët iranianë duhet “të marrin në dorë qeverinë e tyre”.
Ai paralajmëroi gjithashtu se operacioni mund të ketë kosto njerëzore për ushtrinë amerikane, duke pranuar se mund të ketë viktima në radhët e trupave të SHBA-së.
Sulmet e fundit vijnë pas javësh negociatash të pasuksesshme mes Uashingtonit dhe Teheranit për programin bërthamor iranian, duke rritur frikën për një konflikt më të gjerë në rajon.
