Bashkimi Evropian ka shprehur shqetësim të madh për përshkallëzimin e tensioneve në Lindjen e Mesme, pasi Shtetet e Bashkuara dhe Izraeli ndërmorën sulme kundër Iranit, ndërsa Teherani reagoi me kundërsulme.
Diplomatja më e lartë e BE-së, Kaja Kallas, e cilësoi situatën si “të rrezikshme” dhe bëri thirrje për përmbajtje për të shmangur një konflikt më të gjerë në rajon.
Sulmet ndodhën pasi bisedimet mes Iranit dhe SHBA-së për programin bërthamor nuk arritën një marrëveshje, duke rritur ndjeshëm tensionet në rajon.
Në një deklaratë të përbashkët, presidentja e Komisionit Evropian Ursula von der Leyen dhe presidenti i Këshillit Evropian António Costa i cilësuan zhvillimet “shumë shqetësuese”.
Ata theksuan se është thelbësore të ruhet siguria bërthamore dhe të parandalohet çdo veprim që mund të përshkallëzojë më tej konfliktin apo të dëmtojë sistemin global të mospërhapjes së armëve bërthamore.
Edhe presidentja e Parlamentit Evropian, Roberta Metsola, paralajmëroi se sulmet dhe kundërsulmet nuk duhet të çojnë në një spirale përshkallëzimi që mund të kërcënojë jo vetëm Lindjen e Mesme, por edhe Evropën dhe më gjerë.
Ndërkohë, liderë të tjerë evropianë u bënë thirrje palëve që të ndalin sa më shpejt sulmet dhe të rikthehen në rrugën diplomatike për të shmangur një konflikt të gjerë rajonal.
