Presidenti i SHBA-së, Donald Trump, ka paralajmëruar Gardën Revolucionare Islamike të Iranit (IRGC) që të dorëzohet, duke theksuar se përndryshe do të përballet me pasoja të rënda ushtarake. Deklarata e tij erdhi gjatë një fjalimi ku njoftoi për nisjen e një operacioni të madh amerikan kundër objektivave në Iran.
“Anëtarëve të Gardës Revolucionare Islamike, forcave të armatosura dhe gjithë policisë, u them sonte se duhet të ulni armët dhe të keni imunitet të plotë ose, në të kundërt, të përballeni me vdekje të sigurt”, deklaroi Trump.
Sipas raportimeve të mediave ndërkombëtare, Garda Revolucionare Islamike konsiderohet shtylla kryesore e pushtetit në Iran. Ajo u krijua pas Revolucionit Islamik të vitit 1979 për të mbrojtur sistemin teokratik të vendit dhe me kalimin e viteve është shndërruar në një nga strukturat më të fuqishme ushtarake dhe politike në Iran.
IRGC ka një strukturë të gjerë që përfshin forcat tokësore, detare dhe ajrore, si dhe një aparat të fuqishëm inteligjence. Numri i pjesëtarëve të saj vlerësohet të jetë nga 150 mijë deri në 190 mijë trupa dhe ndikimi i saj shtrihet edhe në sektorë të rëndësishëm të ekonomisë iraniane.
Një nga njësitë më të njohura të saj është Forca Quds, e cila merret me operacione jashtë Iranit dhe ka mbështetur grupe të ndryshme në Lindjen e Mesme, përfshirë Hezbollahun në Liban, Hamasin në Gaza dhe Huthit në Jemen.
Ndërkohë, brenda vendit vepron edhe Basij, një organizatë vullnetare që konsiderohet si krah i sigurisë së brendshme të regjimit iranian. Kjo strukturë është përgjegjëse për ruajtjen e rendit dhe për zbatimin e rregullave të moralit islamik në shoqëri.
Tensionet mes SHBA-së dhe Iranit janë përshkallëzuar ndjeshëm ditët e fundit, pas sulmeve të raportuara dhe kërcënimeve për përshkallëzim të mëtejshëm në rajon.
