Misteri rreth gjendjes shëndetësore dhe rolit real në pushtet të Mojtaba Khamenei po thellohet, ndërsa mungesa e tij në publik dhe raportimet për përdorimin e inteligjencës artificiale në imazhet zyrtare kanë ngritur pikëpyetje serioze brenda dhe jashtë Iranit.
Fjalimi i tij i parë si udhëheqës suprem, më 12 mars, nuk u mbajt drejtpërdrejt prej tij, por u lexua nga një prezantuese në televizionin shtetëror, duke shtuar dyshimet për gjendjen e tij. Që prej asaj dite, ai nuk është shfaqur publikisht dhe nuk janë publikuar regjistrime të reja të zërit apo video autentike.
Sipas një analize të Wall Street Journal, disa nga fotografitë e publikuara së fundmi të Khameneit dyshohet se janë të modifikuara ose të krijuara me inteligjencë artificiale. Madje, edhe fotografia e profilit në rrjetet sociale thuhet se bazohet në një imazh të vjetër të përpunuar digjitalisht.
Mungesa e prezencës vizuale është reflektuar edhe në institucionet diplomatike, ku disa ambasada iraniane ende nuk kanë vendosur portrete të tij – një praktikë e zakonshme për liderët supremë të vendit.
Autoritetet iraniane këmbëngulin se ai është gjallë dhe po ushtron detyrat normalisht, por burime të ndryshme ndërkombëtare hedhin dyshime mbi këtë version. Sipas raportimeve, Khamenei mund të jetë plagosur gjatë një sulmi ajror izraelit ku u vra babai i tij, Ali Khamenei, së bashku me disa anëtarë të familjes.
Drejtoresha e Inteligjencës Kombëtare të SHBA-së, Tulsi Gabbard, ka deklaruar se ai mund të jetë plagosur rëndë, duke nxitur edhe më shumë spekulime për një krizë të mundshme brenda strukturave drejtuese në Teheran.
Ndërkohë, zyrtarë iranianë kanë pranuar në mënyrë jozyrtare se ai është i lënduar, por insistojnë se mbetet funksional dhe në një vend të sigurt për arsye sigurie.
Në mungesë të transparencës dhe provave konkrete, pyetjet mbeten të hapura: kush po merr realisht vendimet në Teheran dhe sa i qëndrueshëm është zinxhiri i komandës në një nga momentet më të tensionuara për Iranin në dekadat e fundit.
