Ministrja Fitore Pacolli ka paralajmëruar masa të ashpra ndaj operatorëve të gurëthyesve në Kosovë, duke kërkuar vendosjen e rendit dhe ligjshmërisë në një sektor që prej vitesh është përballur me abuzime dhe dëmtime mjedisore.
Përmes një vendimi urgjent, të gjithë operatorët obligohen t’i nënshtrohen një procesi të plotë verifikimi për përputhshmëri ligjore, teknike dhe mjedisore. Sipas këtij vendimi, kompanitë kanë një afat të prerë prej 15 ditësh për të dorëzuar dokumentacionin e kërkuar.
Autoritetet kanë theksuar se ky afat është i panegociueshëm dhe mosrespektimi i tij do të çojë në pasoja të menjëhershme, përfshirë humbjen e të drejtës për shqyrtim administrativ dhe nisjen e inspektimeve të jashtëzakonshme në terren.
Ky hap vjen pas shqetësimeve të vazhdueshme për shfrytëzim të pakontrolluar të burimeve natyrore dhe dëmtim të peizazheve, ku në shumë raste aktivitetet kanë tejkaluar kufijtë e lejeve të dhëna.
Ministrja Pacolli theksoi se pasuritë natyrore të vendit janë të përbashkëta dhe duhet të shfrytëzohen vetëm në përputhje me ligjin, duke sinjalizuar një qasje më të ashpër të institucioneve ndaj çdo abuzimi në këtë sektor.
