Austria po përgatitet të ndërmarrë një hap të fortë: ndalimin e përdorimit të rrjeteve sociale për fëmijët nën moshën 14 vjeç, në kuadër të një pakete të re për mbrojtjen e të miturve.
Qeveria ka bërë të ditur se ligji pritet të prezantohet deri në fund të qershorit, ndërsa synon të kufizojë ndikimet negative të platformave digjitale tek fëmijët. Zëvendëskancelari Andreas Babler theksoi se masat do të përfshijnë jo vetëm kufirin e moshës, por edhe rregulla më të forta për platformat dhe rritje të edukimit mediatik.
Ky vendim e vendos Austrinë në një linjë me trendin global të rregullimit të rrjeteve sociale për të rinjtë. Vende si Australia kanë vendosur kufij edhe më të lartë (deri në 16 vjeç), ndërsa Spanja dhe Mbretëria e Bashkuar po shqyrtojnë masa të ngjashme. Ndërkohë, Indonezia tashmë ka nisur zbatimin gradual të ndalimeve për të miturit.
