Kombëtarja e Kosovës në futboll po vazhdon të shkruajë histori në arenën ndërkombëtare, duke arritur pozitën e 78-të në renditjen më të fundit të FIFA-s – nivel ky më i larti që nga pranimi në këtë organizatë.
Federata e Futbollit e Kosovës ka bërë të ditur se ky progres i jashtëzakonshëm vjen si rezultat i punës dhe përkushtimit të vazhdueshëm të futbollistëve dhe stafit teknik ndër vite.
Nga një fillim modest në pozitën e 190-të në korrik të vitit 2016, “Dardanët” kanë shënuar një ngritje të qëndrueshme dhe mbresëlënëse, duke u shndërruar në një ekip konkurrues në skenën ndërkombëtare. Ky sukses është vlerësuar edhe nga vetë FIFA, e cila e ka promovuar arritjen përmes publikimeve në rrjetet sociale.
Kosova ka dëshmuar potencialin e saj edhe gjatë kualifikimeve për Kupën e Botës, ndonëse nuk arriti të sigurojë një vend në fazën finale, pasi u ndal në ndeshjen vendimtare të “play-off”-it kundër Turqisë.
Megjithatë, sinjalet janë të qarta: kombëtarja është në rritje të vazhdueshme dhe e ardhmja duket premtuese për futbollin kosovar.
