Situata në Lindjen e Mesme po përshkallëzohet sërish, teksa armëpushimi mes SHBA-së dhe Iranit duket gjithnjë e më i brishtë pas sulmeve të fundit izraelite në Liban.
Në Bejrut, ekipet e shpëtimit po punojnë mes rrënojave pas bombardimeve intensive që lanë pas qindra viktima. Sipas autoriteteve libaneze, të paktën 254 persona janë vrarë dhe mbi 1,100 të tjerë janë plagosur nga sulmet ajrore.
Mes skenave dramatike, shpëtuesit kanë dhënë një mesazh të qartë: “Ne duam të jetojmë në paqe, nuk duam luftë”. Ata theksuan se viktimat janë civilë dhe jo pjesë e Hezbollahu, duke kundërshtuar pretendimet e Izraelit për objektiva ushtarake.
Nga ana tjetër, kryeministri izraelit Benjamin Netanyahu ka paralajmëruar se sulmet do të vazhdojnë, duke u zotuar për një tjetër valë goditjesh ndaj Hezbollahut.
Zhvillimet kanë shkaktuar reagime të ashpra ndërkombëtare. Presidenti i Libanit i ka cilësuar sulmet si “masakër”, ndërsa António Guterres ka paralajmëruar se situata përbën një rrezik të madh për paqen në rajon.
Ndërkohë, Irani ka reaguar duke kërcënuar se do të tërhiqet nga marrëveshja e armëpushimit nëse sulmet në Liban vazhdojnë. Teherani madje ka ndërmarrë hapa të menjëhershëm, duke mbyllur sërish Ngushticën e Hormuzit, një arterie jetike për tregtinë globale të naftës.
Presidenti iranian paralajmëroi se sulmet ndaj Libanit mund t’i bëjnë negociatat “të pakuptimta”, duke shtuar se Irani nuk do t’i braktisë aleatët e tij në rajon.
Në këtë klimë tensioni, bisedimet e paralajmëruara në Pakistan për një marrëveshje më të gjerë paqeje mbeten të pasigurta, ndërsa rajoni po afrohet sërish drejt një përplasjeje më të madhe.
