Bashkimi Evropian dhe Shtetet e Bashkuara të Amerikës kanë hedhur një tjetër gur të rëndë në arkitekturën e bashkëpunimit strategjik, duke nënshkruar një memorandum mirëkuptimi për mineralet kritike – “ari i ri” i ekonomisë moderne.
Marrëveshja u firmos nga sekretari amerikan i Shtetit Marco Rubio dhe komisioneri i Tregtisë i BE-së Maroš Šefčovič, duke sinjalizuar një koordinim më të thellë në sigurimin e zinxhirëve të furnizimit për materiale jetike si litiumi, kobalti dhe elementet e rralla.
Në thelb, kjo marrëveshje është më shumë se ekonomi – është gjeopolitikë e pastër. SHBA dhe BE po kërkojnë të reduktojnë varësinë nga tregjet që dominohen nga Kinë, e cila aktualisht kontrollon një pjesë të madhe të prodhimit dhe përpunimit të këtyre mineraleve.
Rubio e tha pa e thënë: përqendrimi i burimeve në duart e pak aktorëve është një rrezik serioz. Dhe kur Perëndimi fillon të flasë për “diversifikim”, zakonisht do të thotë se loja globale po rishkruhet.
Këto minerale janë themeli i teknologjive të së ardhmes – nga bateritë e makinave elektrike te inteligjenca artificiale dhe industria e mbrojtjes. Pra, kush kontrollon këto burime… kontrollon ritmin e së ardhmes.
Ky memorandum nuk është marrëveshje për sot – është investim për dekadat që vijnë. Dhe sinjali është i qartë: Perëndimi po organizohet për një epokë të re konkurruese.
