Policia e Kosovës ka arrestuar pesë persona të dyshuar për përfshirje në katër vepra të ndryshme penale, pas një hetimi disa mujor nga Drejtoria për Hetimin e Krimeve Ekonomike dhe Korrupsionit (DHKEK) në Ferizaj.
Operacioni është zhvilluar më 28 prill, me urdhër të gjykatës dhe në koordinim me prokurorinë, ku janë kryer kontrolle në tre lokacione të ndryshme në Ferizaj, Gjilan dhe Prishtinë.
Sipas policisë, pesë të dyshuarit, të gjithë meshkuj kosovarë, dyshohet se në bashkëpunim me njëri-tjetrin kanë falsifikuar dokumente, duke u paraqitur si pronarë të disa parcelave në një fshat të Ferizajt.
Njëri nga të dyshuarit dyshohet për veprën penale “keqpërdorim i pozitës apo autoritetit zyrtar”, ndërsa katër të tjerët për “falsifikim dokumentesh”, “legalizim të përmbajtjes së rreme” dhe “blerje, pranim ose fshehje të sendeve të përfituara me vepër penale”.
Gjatë kontrollit janë sekuestruar prova të ndryshme, përfshirë dokumente dhe materiale që pritet të përdoren në procedurat e mëtejshme hetimore.
Të dyshuarit janë intervistuar në prani të avokatëve mbrojtës dhe me vendim të prokurorit janë ndaluar për 48 orë, ndërsa hetimet për rastin po vazhdojnë.
