Shefja e Grupit Parlamentar të Lidhjes Demokratike të Kosovës, Jehona Lushaku-Sadriu, ka refuzuar ofertën e kryeministrit Albin Kurti për një marrëveshje rreth zgjedhjes së presidentit, duke e cilësuar atë si përpjekje për të favorizuar kandidaten e Lëvizjes Vetëvendosje.
Reagimi i saj vjen pasi Kurti deklaroi se është i gatshëm t’i japë edhe 15 nënshkrime LDK-së, nëse kjo parti propozon një kandidat për president, duke sugjeruar një garë mes Feride Rushiti dhe një kandidati të opozitës.
Megjithatë, Lushaku-Sadriu e hodhi poshtë këtë ide, duke thënë se një skenar i tillë do t’i hapte rrugë zgjedhjes së kandidates së mazhorancës.
“Ftesa ishte për ta bërë një kandidate të dytë dhe për t’ia mundësuar kandidates së VV-së me u zgjedh presidente,” u shpreh ajo.
Ajo shtoi se LDK nuk do të mbështesë një proces që, sipas saj, i jep më shumë pushtet kryeministrit.
“Nuk mundemi me ia dhanë votat një kryeministri për me e kap krejt shtetin. Nuk ia ka dhënë populli, nuk mundemi ne me ia dhanë,” deklaroi Lushaku-Sadriu.
Kjo përplasje e re mes pozitës dhe opozitës thellon edhe më tej krizën politike në Kosovë, në një moment vendimtar për zgjedhjen e presidentit dhe fatin e institucioneve.
