Pas Lëvizjes Vetëvendosje dhe Lidhjes Demokratike të Kosovës, edhe Aleancës për Ardhmërinë e Kosovës ka dalë me qëndrim të qartë kundër procesit aktual për zgjedhjen e presidentit.
Shefi i Grupit Parlamentar të AAK-së, Besnik Tahiri, deklaroi në një konferencë për media se partia e tij nuk do të bëhet pjesë e asaj që e cilësoi si “shkatërrim të rendit kushtetues” dhe një spektakël politik që, sipas tij, po zgjat tash e katër muaj.
“S’bëhemi pjesë e një procesi që veç emrin demokraci e zgjedhje presidenti nuk e ka. Emrin e ka manipulim politik i opinionit publik,” u shpreh Tahiri, duke shtuar se AAK nuk do të marrë pjesë në këtë proces në asnjë rrethanë.
Akuza për manipulim dhe përçarje
Tahiri theksoi se ajo që po ndodh aktualisht nuk përfaqëson një proces të mirëfilltë demokratik, por një përpjekje për të manipuluar opinionin publik dhe për të imponuar vendime politike.
Ndërkohë, deputeti i AAK-së, Bekë Berisha, u shpreh se situata do të mund të zgjidhej shumë shpejt nëse opozita do të kishte rol më të madh dhe do të vepronte e bashkuar.
Ai akuzoi kryeministrin Albin Kurti për përçarje politike, duke theksuar se kjo po pengon zhvillimin e vendit.
“Nëse e ndërpresim këtë përçarje, atëherë Kosova do të ecë përpara dhe do të arrijë aspiratat e saj,” tha Berisha.
Krizë politike në thellim
Qëndrimi i AAK-së e thellon edhe më tej përplasjen politike në Kosovë, ku procesi për zgjedhjen e presidentit po zhvillohet pa pjesëmarrjen e opozitës.
Me bojkotin e partive opozitare dhe vazhdimin e procedurave nga mazhoranca, vendi po afrohet gjithnjë e më shumë drejt një krize institucionale dhe mundësisë për zgjedhje të reja.
