Qeveria e Gjermania po përgatit një reformë të re në sistemin shëndetësor, e cila parashikon ndryshime të rëndësishme për punëtorët, përfshirë futjen e lejes së pjesshme mjekësore.
Sipas projektligjit të mbështetur nga partitë CDU/CSU dhe SPD, punonjësit do të kenë mundësinë të vazhdojnë punën edhe gjatë periudhës së sëmundjes, por me orar të reduktuar.
Modeli i ri parashikon që ata të mund të punojnë 25%, 50% ose 75% të orarit të zakonshëm, duke u kthyer gradualisht në punë të plotë. Qëllimi kryesor i kësaj mase është ulja e barrës mbi sistemin shëndetësor dhe rikthimi më i shpejtë i punonjësve në aktivitet të plotë.
Reforma përfshin edhe ndryshime të tjera financiare. Parashikohet rritje e bashkëpagesave për barnat me recetë, që do të variojnë nga 7.50 deri në 15 euro për paketim, ndërsa kufijtë maksimalë vjetorë mbeten të pandryshuar.
Gjithashtu, do të ketë kosto shtesë për sigurimin e bashkëshortëve, përveç rasteve të veçanta si familjet me fëmijë të vegjël apo pensionistët. Për personat me të ardhura më të larta, do të rritet edhe kontributi për sigurimin shëndetësor, duke kufizuar njëkohësisht kalimin në sigurime private.
Një tjetër element i reformës është edhe vendosja e një tarife shtesë për pijet e ëmbla, si pjesë e politikave për përmirësimin e shëndetit publik.
Sipas vlerësimeve zyrtare, këto ndryshime pritet të sjellin kursime mbi 16 miliardë euro, ndërsa sinjalizojnë një drejtim të ri të sistemit shëndetësor gjerman, me fokus në uljen e kostove dhe përfshirjen më të madhe të qytetarëve në financimin e kujdesit shëndetësor.
