Policia e Kosovës ka arrestuar dy persona të dyshuar për mashtrim, pas një operacioni të zhvilluar në Ferizaj dhe Kaçanik.
Rasti ishte raportuar më 17 prill 2026 në rrugën “Cen Dugolli” në Ferizaj, ku të dyshuarit kishin mashtruar tre persona duke u paraqitur rrejshëm si posedues të kriptovalutave. Sipas policisë, ata kanë përvetësuar rreth 12 mijë euro, nga 4 mijë euro secili viktimë, dhe më pas janë arratisur nga vendi i ngjarjes përmes dritares së një lokali.
Pas hetimeve, më 29 prill, policia ka ndërhyrë në kohë në rrugën “Ismail Reka” në Kaçanik, ku të dyshuarit po planifikonin një rast të ngjashëm mashtrimi.
Gjatë operacionit janë arrestuar A.L. (25 vjeç) dhe R.J. (23 vjeç), ndërsa një person i tretë, tashmë i identifikuar, ka arritur të largohet dhe është në kërkim.
Policia ka sekuestruar disa prova materiale, përfshirë një makinë për numërimin e parave, një çantë dhe një veturë të tipit Golf 7.
Me vendim të prokurorit të shtetit, dy të arrestuarit janë ndaluar për 48 orë, ndërsa hetimet për veprën penale “mashtrimi” janë duke vazhduar.
