Papa Leone XIV ka emëruar si ipeshkëv të West Virginia-s Evelio Menjivar-Ayala, një figurë me histori të fortë emigrimi, në një vendim që po interpretohet si sinjal politik ndaj Donald Trump.
Menjivar-Ayala, 55 vjeç, ka emigruar në Shtetet e Bashkuara të Amerikës në vitin 1990 pa dokumente, duke hyrë në mënyrë ilegale për t’i shpëtuar dhunës dhe luftës civile në vendin e tij. Ai ka punuar në punë të rënda si pastrues dhe në ndërtim, përpara se të ndiqte rrugën e priftërisë dhe të ngrihej në hierarkinë kishtare.
Në vitin 2023, ai u bë ipeshkëvi i parë me origjinë nga El Salvador në SHBA, si ndihmës në Arqidioqezën e Uashingtonit. Kohët e fundit, ai ka bërë thirrje publike kundër trajtimit të emigrantëve nga administrata Trump.
Përveç këtij emërimi, Papa ka promovuar edhe Robert Boxie III si ipeshkëv ndihmës në Uashington. Boxie është shprehur hapur kundër sulmeve ndaj diversitetit, duke i cilësuar ato si “anti-amerikane” dhe “anti-të krishtera”.
Këto lëvizje të Vatikanit tregojnë një drejtim të qartë: përkrahje për figura që mbrojnë emigrantët, barazinë dhe drejtësinë sociale – një kontrast i fortë me politikat aktuale të administratës amerikane për emigracionin.
Mesazhi është i qartë, pa shumë diplomaci: Kisha po zgjedh të qëndrojë në anën e atyre që dikur nuk kishin zë.
