Ish-deputeti Haxhi Avdyli ka reaguar ashpër ndaj kritikave dhe sulmeve politike që, sipas tij, po bëhen ndaj Vjosa Osmani, duke akuzuar eksponentë të Lëvizja Vetëvendosje për linçim politik ndaj saj.
Përmes një deklarate publike, Avdyli tha se Osmani po sulmohet për shkak se është grua, por shtoi se ka njerëz që do ta mbrojnë atë politikisht.
“Po dojnë me linçu Vjosa Osmanin se është grua. Por po harrojnë që ka dhe burra që e mbrojnë atë grua”, deklaroi Avdyli.
Ai pati gjithashtu një mesazh të drejtpërdrejtë për Vetëvendosjen, duke kërkuar një garë të ndershme politike para zgjedhjeve të 7 qershorit.
“E ftoj VV-në, bëni luftë të ndershme, sepse nëse doni luftë, luftë keni me pas. Nëse doni bashkëpunim para dhe pas zgjedhjeve, ndershmëri dhe projekte, vazhdojmë me projekte”, u shpreh ai.
Deklarata e Avdylit vjen në një moment të tensionuar në skenën politike kosovare, pas afrimit politik ndërmjet Lumir Abdixhiku dhe Vjosa Osmanit për zgjedhjet e parakohshme parlamentare të 7 qershorit, zhvillim që ka nxitur reagime dhe përplasje mes kampeve politike në vend. Burimi: Kanal 10
